เถรา’ปิ เต มติปทีปหตนฺธการา,
โลกนฺธการหนนมฺหิ มหาปทีปา;
นิพฺพาปิตา มรณโฆรมหานิเลน,
เตนาปิ ชีวิตมทํ มติมา ชเหยฺยาติฯ
สุชนปฺปสาทํสํเวคตฺถาย กเต มหาวํเส
ปฐมธมฺมสํคีตินาม
ตติโย ปริจฺเฉโทฯ
จตุตฺถ ปริจฺเฉท
ทุติย สํคีติ
[1]
อชาตสตฺตุ ปุตฺโต ตํ, ฆาเตตฺวา’ทายิ ภทฺทโก;
รชฺชํ โสฬสวสฺสานิ, กาเรสิ มิตฺตทูภิโกฯ
[2]
อุทยภทฺท ปุตฺโต ตํ, ฆาเตตฺวา อนุรุทฺธโก;
อนุรุทฺธสฺส ปุตฺโต ตํ, ฆาเตตฺวา มุณฺฑนามโกฯ
[3]
มิตฺตทฺทุโน ทุมฺมติโน, เต’ปิ รชฺชมการยุํ;
เตสํ อุภินฺนํ รชฺเชสุ, อฏฺฐวสฺสาน’ติกฺกมุํฯ
[4]
มุณฺฑสฺส ปุตฺโต ปิตรํ, ฆาเตตฺวา นาคทาสโก;
จตุวีสติวสฺสานิ, รชฺชํ กาเรสิ ปาปโกฯ
[5]
ปิตุฆาตกวํโส’ย, มีติกุทฺธา’ถ นาครา;
นาคทาสก ราชานํ, อปเนตฺวา สมาคตาฯ
[6]
สุสุนาโคติ ปญฺญาตํ, อมจฺจํ สาธุสมฺมตํ;
รชฺเช สมภิสิญฺชิํสุ, สพฺเพสํ หิตมานสาฯ
[7]
โส อฏฺฐารสวสฺสานิ, ราชา รชฺชมการยิ;
กาฬาโส โก ตสฺส ปุตฺโต, อฏฺฐวีสติ การยิฯ
[8]
อตีเต ทสเม วสฺเส, กาฬาโสกสฺส ราชิโน;
สมฺพุทฺธปรินิพฺพานา, เอวํ วสฺสสตํ อหุฯ
[9]
ตทา เวสาลิยา ภิกฺขู, อเนกา วชฺชิปุตฺตกา;
สิงฺคีโลณํ ทฺวงฺคุลญฺจ, ตถา คามนฺตรมฺมิ จฯ
[10]
อาวาสา’นุมตา’จิณฺณํ, อมถิตํ ชโลคิ จ;
นิสีทนํ อทสกํ, ชาตรูปาทิกํ อิติฯ
[11]
ทสวตฺถูนิ ทีเปสุํ, กปฺปนฺตีติ อลชฺชีโน;
ตํ สุตฺวาน ยสตฺเถโร, เอวํ วชฺชีสุ จาริกํฯ
[12]
ฉฬภิญฺโญ พลปฺปตฺโต, ยโส กากณฺฑกตฺรโช;
ตํ สเมตุํ สอุสฺสาโห, ตตฺถาคมิ’มหาวนํฯ
[13]
ฐเปตฺวา’โปสถคฺเค เต, กํสปาติํ สโหธกํ;
กหาปณาทิํ สงฺฆสฺส, เทถ’นา’หุ อุปาสเกฯ
[14]
น กปฺปเต ตํ มา เทถ, อิติ เถโร สวารยิ;
ปฏิสารณียํ กมฺมํ, ยสตฺเถรสฺส เต กรุํฯ
[15]
ยาจิตฺวา อนุทูตํ โส, สห เตน ปุรํ คโต;
อตฺตโน ธมฺมวาทิตฺตํ, สญฺญาเปตฺวา’ค สาคเรฯ
[16]
อนุทูตวโจ สุตฺวา, ตมุกฺขิปิตุมาคตา;
ปริกฺขิปิย อฏฺฐํสุ, สรํ เถรสฺส ภิกฺขโวฯ
[17]
เถโร อุคฺคมฺม นภสา, คนฺตฺวา โกสมฺพิยํ ตโต;
ปาเวยฺยกา วนฺติกานํ, ภิกฺขูนํ สนฺติกํ ลหุํฯ
[18]
เวเสสิ ทูเตตุ สยํ, คนฺตฺวา’โห คงฺคปพฺพตํ;
อาห สมฺภูตตฺเถรสฺส, ตํ สพฺพํ สาณวาสิโนฯ
[19]
ปาเวยฺยกา สฏฺฐิเถรา, อสิตา’วนฺติกาปิ จ;
มหาขีณาสวา สพฺเพ, อโหคงฺคมฺหิ โอตรุํฯ
[20]
ภิกฺขโว สนฺนิปติตา, สพฺเพ ตตฺถ ตโต ตโต;
อาสุํ นวุติสหสฺสานิ, มนฺเตตฺวา อขิลา’ปิ เตฯ
[21]
โสเรยฺย เรวตตฺเถรํ, พหุสฺสุต มนาสวํ;
ตํ กาลปมุขํ ญตฺวา, ปสฺสิตุํ นิกฺขมิํสุ ตํฯ
[22]
เถโร ตมฺมนฺตนํ สุตฺวา, เวสาลิํ คนฺตุเมว โส;
อิจฺฉนฺโต ผาสุคมนํ, ตโต นิกฺขมิ ตงฺขณํฯ
[23]
ปาโต ปาโตว นิกฺขนฺต-ฏฺฐานํ เตน มหตฺตนา;
สายํ สายมุเปนฺตานํ, สหโชติยมทฺทสุํฯ
[24]
ตตฺถ สมฺภูตตฺเถเรน, ยสตฺเถโร นิโยชิโต;
สทฺธมฺมสวนนฺเต ตํ, เรวตเถร มุตฺตมํฯ
[25]
อุเปจฺจ ทสวตฺถูนิ, ปุจฺฉิ เถโร ปฏิกฺขิปิ;
สุตฺวา’ธิกรณํ ตญฺจ, นิเสเธมาติ อพฺรวิฯ
[26]
ปาปาปิ ปกฺขํ เปกฺขนฺตา, เรวตตฺเถร มุตฺตมํ;
สามณกํ ปริกฺขารํ, ปฏิยาทิย เต พหุํฯ
[27]
สีฆํ นาวาย คนฺตฺวาน, สหชาติสมีปคา;
กโรนฺติ ภตฺตวิสฺสคฺคํ, ภตฺตกาเล อุปฏฺฐิเตฯ
[28]
สหชาติํ อาวสนฺโต, สาฬเถโร วิจินฺติยา;
ปาเวยฺยกา ธมฺมวาที, อิติ ปสฺสิ อนาสโวฯ
[29]
อุเปจฺจ ตํ มหาพฺรหฺมา, ธมฺเม นิฏฺฐาติ อพฺรวิ;
นิจฺจํ ธมฺเม ฐิตตฺตํ โส, อตฺตโน ตสฺส อพฺรวิฯ
[30]
เต ปริกฺขารมาทาย, เรวตตฺเถรมทฺทสุํ;
เถโร น คณฺหิ ตปฺปกฺข-คาหี สิสฺสํ ปณามยีฯ
[31]
เวสาลิํ เต ตโต คนฺตฺวา, ตโต ปุปฺผปุรํ คตา;
วทิํสุ กาฬาโสกสฺส, นรินฺทสฺส อลชฺชีโนฯ
[32]
สตฺถุสฺส โน คนฺธกุฏิํ, โคปยนฺโต มยํ ตหิํ;
มหาวนวิหารสฺมิํ, วสาม วชฺชีภูมิยํฯ
[33]
คณฺหิสฺสาม วิหาร’นฺติ, คามวาสิกสิกฺขโว;
อาคจฺฉนฺติ มหาราช, มฏิเสธย เต อิติฯ
[34]
ราชานํ ทุคฺคหิตํ เต, กตฺวา เวสาลิมาคมุํ;
เรวตตฺเถร มูลมฺหิ, สหชาติยเมตฺถ ตุฯ
[35]
ภิกฺขู สตสหสฺสานิ, เอกาทส สมาคตา;
นวุติญฺจ สหสฺสานิ, อหุ ตํ วตฺถุ สนฺติยาฯ
[36]
มูลฏฺเฐหิ วินา วตฺถุ-สมนํ เนว โรจยิ;
เถโร สพฺเพปิ ภิกฺขู เต, เวสาลิมาคมุํ ตโตฯ
[37]
ทุคฺคหิโตว โส ราชา, ตตฺถามจฺเจ อเปสยิ;
มูฬา เทวานุภาเวน, อญฺญตฺถ อคมิํสุ เตฯ
[38]
เปเสตฺวา เต มหีปาโล, ตํ รตฺติํ สุปิเนนโส;
อปสฺสิ สกมตฺตานํ, ปกฺขิตฺตํ โลหกุมฺภิยํฯ
[39]
อติภีโต อหุ ราชา, ตมสฺสา เสตุ มาคมา;
ภคินี นนฺทเถรี ตุ, อากาเสน อนาสวาฯ
[40]
ภาริยํ เต กตํ กมฺมํ, ธมฺมิเก’ยฺเย ขมาปย;
ปกฺโข เตสํ ภวิตฺวา ตฺวํ, กุรุ สาสนปคฺคหํฯ
[41]
เอวํ กเต โสตฺถิ ตุยฺหํ, เหสฺสตีติ อปกฺกมิ;
ปสาเตเยว เวสาลิํ, คนฺตุํ นิกฺขมิ ภูปติฯ
[42]
คนฺตฺวา มหาวนํ ภิกฺขู-สงฺฆํ โส สนฺนิปาติย;
สุตฺวา อุภินฺนํ วาทญฺจ, ธมฺมปกฺขญฺจ โรจิยฯ
[43]
ขมาเปตฺวา ธมฺมิเก เต, ภิกฺขู สพฺเพ มหีปติ;
อตฺตโน ธมฺมปกฺขตฺตํ, วตฺวา ตุมฺเห ยถารุจิฯ
[44]
สมฺปคฺคหํ สาสนสฺส, กโรถาติ จ ภาสิย;
ทตฺวา จ เตสํ อารกฺขํ, อคมาสิ สกํ ปุรํฯ
[45]
นิจฺเฉตุํ ตานิ วตฺถูนิ, สงฺโฆ สนฺนิปตี ตทา;
อนคฺคานิ ตตฺถ ภสฺสานิ, สงฺฆมชฺเฌ อชายิสุํฯ
[46]
ตโต โส เรวตตฺเถโร, สาเวตฺวา สงฺฆมชฺฌโค;
อุพฺภาหิกาย ตํ วตฺถุํ, สเมตุํ นิจฺฉยํ อกาฯ
[47]
ปาจินเกจ จตุโร, จตุโร ปาเวยฺยเกปิ จ;
อุพฺภาหิกาย สมฺมนฺนิ, ภิกฺขู ตํ วตฺถุ สนฺติยาฯ
[48]
สพฺพกามี จ สาฬฺโห จ, ขุชฺชโสภิตนามโก;
วาสภคามิโก จาติ, เถโร ปาจินกา อิเมฯ
[49]
เรวโต สาณสมฺภูโต,
ยโส กาโกณฺฑกตฺรโช;
สุมโน จาติ จตฺตาโร,
เถรา ปาเวยฺยกา อิเมฯ
[50]
สเมตุํ ตานิ วตฺถูนิ, อปฺปสทฺทํ อนากุลํ;
อคมุํ วาลุการามํ, อฏฺฐตฺเถรา อนาสวาฯ
[51]
ทหเรนา’ชิ เต เนตฺถ, ปญฺญตฺเต อาสเน สุเภ;
นิสีทิํสุ มหาเถรา, มหามุนิ มตญฺญุโนฯ
[52]
เตสุ วตฺถูสุ เอเกกํ, กมโต เรวโต มหา;
เถโร เถรํ สพฺพกามิํ, ปุจฺฉิ ปุจฺฉาสุ โกวิโทฯ
[53]
สพฺพกามี มหาเถโร, เตน ปุฏฺโฐ’ถ พฺยากริ;
สพฺพานิ ตานิ วตฺถูนิ, น กปฺปนฺตีติ สุตฺตโตฯ
[54]
นิหนิตฺวา’ธิกรณํ, ตํ เต ตตฺถ ยถากฺกมํ;
ตเถว สงฺฆมชฺเฌปิ, ปุจฺฉาวิสฺสชฺชนํ กรุํฯ
[55]
นิคฺคหํ ปาปภิกฺขูนํ, ทสวตฺถุกทีปนํ;
เตสํ ทสสหสฺสานํ, มหาเถโร อกํสุ เตฯ
[56]
สพฺพกามี ปุถวิยา, สงฺฆตฺเถโร ตทา อหุ;
โส วีสํ วสฺสสติโก, ตทา’สิ อุปสมฺปทาฯ
[57]
สพฺพกามี จ สาฬฺโห จ,
เรวโต ขุชฺชโสภิโต;
ยโส กาโกณฺฑกสุโต,
สมฺภูโต สาณวาสิโกฯ
[58]
เถรา อานนฺทตฺเถรสฺส, เอเต สทฺธิวิหาริโน;
วาสภคามิโก เจว, สุมโน จ ทุเว ปนฯ
[59]
เถรา’นุรุทฺธตฺเถรสฺส, เอเต สทฺธิวิหาริโน;
อฏฺฐ เถรา’ปิ ธญฺญา เต, ทิฏฺฐปุพฺพา ตถาคตํฯ
[60]
ภิกฺขู สตสหสฺสานิ, ทฺวาทสาสุํ สมาคตา;
สพฺเพสํ เรวตตฺเถโร, ภิกฺขูนํปมุโขตทาฯ
[61]
ตโต โส เรวตตฺเถโร, สทฺธมฺมฏฺฐิติยา จิรํ;
กาเรตุํ ธมฺมสํคีติํ, สพฺพภิกฺขุสมูหโตฯ
[62]
ปภินฺนตฺถาทิญาณานํ, ปิฏกตฺตยธารินํ;
สตานิ สตฺตภิกฺขูนํ, อรหนฺตานมุจฺจินิฯ
[63]
เต สพฺเพ วาลุการาเม, กาฬาโสเกน รกฺขิตา;
เรวตตฺเถรปาโมกฺขา, อกรุํ ธมฺมสงฺคหํฯ
[64]
ปุพฺเพ กตํ ตถา เอว, ธมฺมํ ปจฺฉา จ ภาสิตํ;
อาทาย นิฏฺฐเปสุํ ตํ, เอตํ มาเสหิ อฏฺฐหิฯ
[65]
เอวํ ทุติยสํคีติํ, กตฺวา เตปิ มหายสา;
เถรา โทสกฺขยํ ปตฺตา, ปตฺตากาเลน นิพฺพุติํฯ
[66]
อิติ ปรมมตีนํ ปตฺติปตฺตพฺพกานํ,
ติภวหิตกรานํ โลกนาเถรสานํ;
สุมริยมรณํ ตํ สงฺขตา สารกตฺตํ,
ปริคณิยมเสสํ อปฺปมตฺโต ภเวยฺยาติฯ
สุชนปฺปสาทสํเวคตฺถาย กเต
มหาวํเส ทุติยสํคีติ นาม
จตุตฺโถ ปริจฺเฉโทฯ
ปญฺจม ปริจฺเฉท